جفّت ينابيع روحي وانطفى نوري
خابت حظوظي وبَحْداق العنا غارَت
قضبان صدري تلاقت ودّها زوري
حتى اختنقت ومباديهم معي حارت
والشعر أقلّبه ِ فيني لجل ِ مايوري
لين انتظاري وأبياتي بي احتارت
مرجيحة العمر بالتخمين بي دوري
لمّي تفاصيل ياس ٍ داخلي غارت
قومي انفضيني وزيحي غمّ ديجوري
دوري ودوري وعَدّي احْظوظ ماسارت
كفّي بكفّك نِلملم زاكيَ الجوري
نلمس معان ٍ تهادى مابعد طارت
طوّحني الحلم لعبه وابتدأ دوري
أطوّح الحلم وآمال ٍ عليّ دارت
ياسيد الغيم لحظة دوك دستوري
حكمه إذا مَ تْعرفها / عِدّها بارت
لاتعطي الودّ كلّه / لو تبي شوري
لَحد ٍ يَحَسْبِه هدايا ناس له زارت
واقرأ المشاعر لعلّك تفهم اشعوري
بعض المشاعر رسايل كيف ماصارت
وغيمات شوقي حزينه / قِلّها موري
لاشفت دخّانها / فَ اعيونها فارت
أغرف ونشرب سواسي أنت وازهوري
نروي عطشنا وْ قُلوب ٍ للهوى اختارت
وان ماسمعت المبادي وْخانك اغروري
إدمح زلل حاجة ٍ واشواق بي ثارت
وان ثار شوقي وحامت حولك اطيوري
فالشوق وصلك ولكن حيلتي جارت
الشاعر الحزين
